ख्रीष्टमस आयो अनि गयो ! धेरै व्यक्तिहरु (ख्रीष्टलाई विश्वास गर्ने र ख्रीष्टलाई विश्वास नगर्नेहरु) सबैले खीष्टमस मनाए ! कतिले रमाईलोको लागि ठुला–ठुला होटलमा ईभ मनाए, कतिले बियर, हुस्कीको साथै चुस्की खाए कतै डान्स पार्टी त कतै रमाईलो गर्दै ख्रीष्टमसको शुभकामना साता–साट गरे.... के यति मात्र हो तँ ख्रीष्टसम ? बाईबलले भन्छ दुई हजार वर्ष पहिले जन्मनु भएको येशू ख्रीष्टकोबारेमा भविष्यवाणी हजारौ वर्ष पहिले अगमवक्ताहरु मार्फत गरिएको थियो । (यशैया ७:१४) यसैकारण परमप्रभु आफैले तिमीहरूलाई एउटा चिन्ह दिनुहुनेछ। हेर, कन्या गर्भवती हुनेछ, र त्यसले एउटा छोरा जन्माउनेछ र उनको नाउँ इम्मानुएल राखिनेछ। (“इम्मानुएल” को अर्थ “परमेश्वर हामीहरूसँग” हो।)
“तर ए बेथलेहेम एप्राता, तँ यहूदाका कुलहरूमध्ये सानो भए तापनि तँबाट मेरो निम्ति एक जना निस्कनुहुनेछ, जो इस्राएलका शासक हुनुहुनेछ, जसको सुरु पुरानो समयदेखि, अर्थात् प्राचीनकालदेखि नै छ।” (मीका ५:२)

सोहि भविष्यवाणीलाई पुरा गर्दै दुई हजार वर्ष पहिले येशू ख्रीष्ट (Jesus) को जन्म भयो..... ! "तिनीहरू त्यहाँ भएकै बेला मरियमको बालक जन्माउने बेला आयो।
तिनले आफ्नो जेठो छोरो जन्माइन् र उहाँलाई लुगाले बेह्रेर डूँड़मा राखिन्, किनकि तिनीहरूका निम्ति पौवामा ठाउँ थिएन। (लूका २:६,७) त्यही इलाकामा गोठालाहरू थिए, जसले चउरमा बसेर राती आफ्नो बगालको रखवाली गर्थे। प्रभुका एक जना स्वर्गदूत तिनीहरूकहाँ देखा परे, र प्रभुको तेज तिनीहरूका वरिपरि चम्क्यो, अनि तिनीहरू साह्रै डराए। तब स्वर्गदूतले तिनीहरूलाई भने, “नडराओ, किनभने हेर, म तिमीहरूलाई बड़ो आनन्दको सुसमाचार सुनाउँछु, जो सबै मानिसहरूका निम्ति हुनेछ। आज दाऊदको सहरमा तिमीहरूका निम्ति एक जना मुक्तिदाताको जन्म भएको छ, जो ख्रीष्ट प्रभु हुनुहुन्छ। तिमीहरूलाई चिन्हचाहिँ यो हुन्छः तिमीहरूले एउटा बालकलाई लुगाले बेह्रेको र डूँड़मा सुताइराखेको भेट्टाउनेछौ।”(लूका २:८-१२)

दुःख को कुरा प्रभु येशू जन्मनु हुदाँ कहि कतै ठाँऊ थिएन न कुनै घरको कोठा खाली थियो, न होटल, गेष्टहाउसमा खाली थियो ! सबै ठाँऊ जति बेतलेहेम शहरमा घरहरु थियो त्यो सबै खचाखच मानिसहरुले भरीएको थियो कारण त्यो समयमा त्यस साम्राज्यमा भएका राजाले जनगणा लिन उर्दी गरेका थिए ! "ती दिनमा कैसर अगस्टसले तिनको सारा साम्राज्यमा जनगणना लिनू भन्ने हुकुम जारी गरे। (लूका २:१)" ती समयमा सबै मानिसहरु आ–आफ्नै काममा व्यस्त थिए कसैलाई कसैको वास्ता थिएन, दया माया पनि थिएन, यदि दया माया भएको भए बालक येशूले गाईको गोठमा जन्मनु पर्ने थिएन होला...! कल्पना गरौं गाईको गोठ कस्तो हुन्छ....? अहिलेको समयमा हो भने बच्चा र आमा दुवईलाई ईन्फेक्शन हुने थियो !! तर परमेश्वरको अनुग्रह भएको कारण त्याहाँ न चिसो थियो, न फोहर थियो.....

जब बालक येशूको जन्म भयो बालक येशूलाई भेट गर्ने मानिसहरु कस्ता थिए ? ज्योतिषीहरु: अनि घरभित्र पसेर तिनीहरूले बालकलाई उहाँकी आमा मरियमको साथमा देखे, र घोप्टो परेर उहाँलाई दण्डवत् गरे। तब आफ्ना कन्तुर खोलेर उहाँलाई सुन, सुगन्धित धूप र मूर्रका भेटी चढ़ाए। (मत्ती २:११) गोठालाहरु: तिनीहरू आतुरीसँग गए, र मरियम र योसेफ दुवैलाई, र बालकलाई चाहिँ डूँड़मा सुतिरहेका भेट्टाए। (लूका २:१६) अन्य मानिसहरु सबै व्यस्त थिए र आज पनि सबै मानिसहरु व्यस्त छन् ।

प्रत्यक वर्षको ख्रीष्टमसमा नयाँ लुगा लगाउनु, मीठो–मीठो खानु, रमाईलो गर्नु वाहेक अरु परिवर्तन केहि छैन । शहरको बसाई, यहाँको कोलाहाल अनि स्वार्थपुर्ण मानिसहरुको व्यवहारले आज पनि त्यहि दुई हजार वर्ष पहिले बेतलेहममा भएको घटनालाई झ–झल्काई रहेझै लाग्छ । आज पनि मानिसहरुको हृदयमा ख्रीष्ट येशूको निम्ति कतै ठाउँ छैन.... किनकी घमण्डले हृदय भरिएको छ, पापमय स्वभावले भरिएको छ, रिस र डाहाले भरिएको छ, स्वार्थले भरिएको छ । लोभ, लालचले भरिएको छ । खोई त हाम्रो परिवर्तन ?

परमेश्वरले बनाउनु भएको मानिसलाई उहाले मेटाउन पनि सक्नु हुन्थ्यो तर उहाले त्यसो गर्नु भएन बरु एक मात्र पुत्रलाई दिनु भयो “किनभने परमेश्वरले संसारलाई यस्तो प्रेम गर्नुभयो, कि उहाँले आफ्ना एकमात्र पुत्र दिनुभयो, ताकि उहाँमाथि विश्वास गर्ने कोही पनि नाश नहोस्, तर त्यसले अनन्त जीवन पाओस्। (यूहन्ना ३:१६) किनकी येशू नै बाटो हुनुहुन्छ येशूले तिनलाई भन्नुभयो, “बाटो, सत्य र जीवन म नै हुँ। मद्वारा बाहेक कोही पनि पिताकहाँ आउन सक्दैन। (यूहन्ना १४:६) बाईबलले भन्छ "अरू कसैमा मुक्ति छैन, किनकि हामीले मुक्ति पाउनलाई स्वर्गमुनि मानिसहरूमा अर्को कुनै नाउँ दिइएको छैन ।" (प्रेरित ४:१२)

त्यस कारण हामीले ठुला–ठुला तारे होटलमा ईभ मनाएर बियर, हुस्कीको चुस्की लगाउदै डान्स पार्टीमा रमाएर शुभकामना दिँइदा के त्यो साँचो ख्रीष्टमस बन्ला त ? मलाई लाग्छ दुई हजार वर्ष पहिले जन्मनु भएको येशूलाई पुनः जन्माऊन त नसकिएला तर साँचो बिश्वास गरेर हाम्रो गोठरुपी हृदय भित्र रहेका खराब आचरणहरु, पापमय स्वभावहरु र संसारीक ईच्छा, आकङक्षाहरुलाई फालेर, सफा गरेर हाम्रो हृदयमा ख्रीष्ट येशूमा भएको स्वभावलाई र आत्मिय चालचलनलाई जन्माउन भने अवश्य सकिन्छ...... तसर्थ हाम्रो टुटेको हृदयलाई ख्रीष्टमा समरपन गरेर परिवर्तन गर्न सके साँचो ख्रीष्टमस बन्ला की.....!!!???